நெல்லையை சேர்ந்த 5 பேர் பலியா?: தகவல் கிடைக்காததால் உறவினர்கள் கவலை

தீ விபத்தில் “தமிழ்நாடு எக்ஸ்பிரஸ்” ரெயிலின் எஸ்-11 பெட்டி முழுவதும் தீயில் உருக்குலைந்தது. இந்த ரெயிலில் நெல்லை மாவட்டம் ஆலங்குளம் அருகே உள்ள ஐந்தாம் கட்டளை கிராமத்தை சேர்ந்த டேவிட்ராஜாவின் மனைவி குழந்தைகள் பயணம் செய்தனர். 

டேவிட்ராஜா டெல்லி போலீசில் வெடிகுண்டு நிபுணர் குழுவில் பணியாற்றுகிறார். இவர் கடந்த சனிக்கிழமை தமிழ்நாடு எக்ஸ்பிரஸ் ரெயிலில் தனது மனைவி பொன்மணி, 5 வயது, 7 வயது நிரம்பிய 2 குழந்தைகள், மைத்துனர் தவமணி, தாய் ஆகியோரை அனுப்பி வைத்தார். 

எஸ்.11 பெட்டியில் 43, 46, 47 ஆகிய இருக்கைகள் அவர்களுக்கு ஒதுக்கப்பட்டு இருந்தது. 2 குழந்தைகளுக்கு டிக்கெட் கிடையாது. நேற்று இரவு 11 மணிக்கு பொன்மணி சென்னையில் இருக்கும் தனது சித்தி மகன் செல்வத்திடம் செல்போனில் பேசினார். நாளை காலை சென்னை வந்து விடுவேன். எங்களை அழைத்து செல்ல கார் கொண்டு வா என்று கூறியுள்ளார். 

செல்வம் பூங்காநகரில் லாரி புக்கிங் அலுவலகம் நடத்தி வருகிறார். அதனால் அவர் தங்களுக்கு சொந்தமான காரை ஏற்பாடு செய்து இருந்தார். இந்த நிலையில், தமிழ்நாடு எக்ஸ்பிரஸ் ரெயிலில் தீப் பிடித்ததை இன்று அறிந்த செல்வம் பதறி போனார். உடனடியாக அக்காளுக்கு செல்போனில் தொடர்பு கொண்டார். ஆனால் எந்த பதிலும் கிடைக்கவில்லை. காயம் அடைந்தவர்கள் பட்டியலிலும் அவர்கள் பெயர்கள் இல்லாததால் செல்வம் பதறி போனார். 

இதையடுத்து செல்வமும், அவரது சகோதரர் மரிய செல்வமும் சிறப்பு ரெயிலில் நெல்லூர் புறப்பட்டனர். முன்னதாக செல்வம் மாலை மலர் நிருபரிடம் கண்ணீர் மல்க கூறியதாவது:- 

டெல்லியில் இருக்கும் எனது பெரியம்மா மகள் பொன்மணி தமிழ்நாடு எக்ஸ்பிரஸ் ரெயிலில் சென்னை வந்து கொண்டு இருந்தார். இரவு 11 மணிக்கு என்னுடன் பேசினார். காலை வந்துவிடுவேன் என்று கூறினார். எனது அக்காள் பயணம் செய்த பெட்டிதான் தீப்பிடித்து உள்ளது. இன்று அவரது செல்போனில் பேச முயன்றேன். ஆனால் எந்த தொடர்பும், தகவலும் கிடைக்கவில்லை. காயம் அடைந்தவர்களின் பெயர் பட்டியலிலும் எனது அக்காள் பெயர் இடம்பெறவில்லை. அவரது கதி என்ன என்றே தெரியாமல் இருக்கிறோம். 

இவ்வாறு அவர் கூறினார்.