விழியே பேசு...: தேர்தல் பிரசாரத்தில் ஜெயலலிதாவை தாக்கி பேசவில்லை: வடிவேலு பல்ட்டி

Monday, April 18, 2011

காமெடி நடிகர் வடிவேலு தேர்தல் பிரசாரத்தில் தி.மு.க.வின் நட்சத்திர பேச்சாளராக திகழ்ந்தார். அவர் கூட்டங்களுக்கு முன்னணி தலைவர்களுக்கு இணையாக மக்கள் திரண்டார்கள். பேச்சையும் ஆரவாரத்தோடு ரசித்தனர். பிரசாரத்தில் விஜயகாந்தையே கடுமையாக தாக்கி பேசினார். அ.தி.மு.க. பொதுச் செயலாளர் ஜெயலலிதாவை எந்த கூட்டத்திலும் விமர்சித்து பேச வில்லை என்றார்.

இதுகுறித்து வடிவேலு அளித்த பேட்டி வருமாறு:-

தேர்தல் பிரசாரத்தில் எனது பேச்சை கேட்க பெரும் கூட்டம் கூடியது. மக்கள் அளித்த வரவற்பு இனிமையான அனுபவமாக இருந்தது. அது என்னை உற்சாகப்படுத்தவும் செய்தது. அ.தி.மு.க.வுக்கு சாதகமாக வரும் கருத்துக் கணிப்புகளை நான் பொருட்படுத்தவில்லை. தேர்தலில் உறுதியாக தி.மு.க. அமோக வெற்றி பெறும். கலைஞர் மீண்டும் முதல்வர் ஆவார். எனது தேர்தல் பிரசாரம் கலைஞருக்கு மகிழ்ச்சி அளித்துள்ளது.

கூட்டங்களில் ஜெயலலிதாவை தாக்கி பேசவில்லையே என்று கேட்கிறார்கள். தி.மு.க. அரசின் திட்டங்கள் பற்றி பிரசாரத்தில் பேசினாலே போதும் என முதல்வரும், துணை முதல்வரும் என்னிடம் கேட்டுக் கொண்டனர். எனது பேச்சும் அதை ஒட்டியே இருந்தது. விஜயகாந்தை கடுமையாக தாக்கி பேசுவதற்கு சில காரணங்கள் உள்ளன.

அவர் நடித்த படம் ஒன்றில் நான் காமெடி வேடம் செய்தேன். ஒரு காட்சியில் விஜயகாந்தை பார்த்து வருங்கால முதல்வர் என்று வசனம் பேச சொன்னார்கள். நான் அவ்வாறு பேச முடியாது என்று மறுத்து விட்டேன். அன்று முதல் எங்களுக்குள் கருத்து வேறுபாடு இருந்து வருகிறது. எனக்கு நிறைய கொலை மிரட்டல்கள் வருகின்றன. அவர்கள் யார் என்று தெரியவில்லை. முதல்- அமைச்சர் கலைஞரிடம் இந்த மிரட்டல்கள் பற்றி கூறினேன். அவர் எனது வீட்டில் போலீஸ் பாதுகாப்புக்கு ஏற்பாடு செய்துள்ளார்.

இவ்வாறு வடிவேலு கூறினார்.

இன்றைய செய்திகள்...