விழியே பேசு...: தேர்தல் நடத்தை விதிமுறைகள் தளர்வு : தமிழக தலைமை தேர்தல் அதிகாரி அறிவிப்பு

சட்டசபை தேர்தலையொட்டி நடைமுறையில் இருந்த தேர்தல் நன்னடத்தை விதிமுறைகள் சிலவற்றை, தேர்தல் கமிஷன் தளர்த்தி உள்ளது. இதுகுறித்து தமிழக தலைமை தேர்தல் அதிகாரி வெளியிட்டுள்ள செய்திக்குறிப்பு: தமிழகம் மற்றும் புதுச்சேரியில் சட்டசபை தேர்தல் முடிவடைந்துள்ளதால், தேர்தல் நடத்தை விதிமுறைகள் தளர்த்தப்பட்டுள்ளன.

இதன்படி, ஏற்கனவே அங்கீகரிக்கப்பட்ட அரசு பணிகளுக்கு டெண்டர்கள் விடலாம். இருந்தாலும், டெண்டர்களை அனுமதிக்கும் முன்னர் தேர்தல் கமிஷனின் அனுமதி பெற வேண்டும். இறுதி செய்யப்பட்ட பணிகளை துவக்கலாம் மற்றும் பணிக்கான ஆர்டர்களை வழங்கலாம். உள்ளாட்சி அமைப்புகளின் கூட்டங்களை நடத்தி, முடிவு எடுக்கலாம்.

அமைச்சர் தங்கள் பணி நிமித்தம் வாகனங்களை பயன்படுத்துவதற்கு விதிக்கப்பட்டிருந்த கட்டுப்பாடும் தளர்த்தப்படுகிறது. மின்னணு ஓட்டுப்பதிவு இயந்திரங்கள் வைக்கப்பட்டுள்ள, "ஸ்ட்ராங் ரூம்' வளாகத்திற்கு வெளியே புறபாதுகாப்பு எல்லை வரை, அவர்கள் சுழல் விளக்கு பொருத்தப்பட்ட அரசு வாகனத்தில் செல்லலாம்.

ஸ்ட்ராங் ரூம்' வளாகத்திலிருந்து ஒரு கிலோமீட்டருக்குள் பொதுக்கூட்டங்கள், ஊர்வலங்கள் நடத்தக் கூடாது. போலீசார், வருவாய் துறையினர் மற்றும் தேர்தல் அலுவலர்களுடன் மத்திய, மாநில அமைச்சர்கள் மற்றும் அரசு செயலர்கள் கலந்தாய்வு நடத்தக் கூடாது. அலுவலர்களும் தேர்தல் கமிஷனின் முன் அனுமதியின்றி, அமைச்சர்களின் கலந்தாய்வு கூட்டங்களில் பங்கேற்கக் கூடாது.

அடுத்த மாதம் 11ம் தேதி முதல் 15ம் தேதி வரை அரசு விருந்தினர் மாளிகைகள், தேர்தல் பார்வையாளர்களுக்கு ஒதுக்கப்பட உள்ளன. மற்ற நாட்களில் இவற்றை தங்கள் துறைப் பணிகளுக்காக அமைச்சர்கள் பயன்படுத்தலாம். தேசிய ஊரக வேலைவாய்ப்பு திட்டப் பணிகள் தொடரலாம். எம்.எல்.ஏ.,க்களுக்கான தொகுதி மேம்பாட்டு நிதியை வழங்குவதில் உள்ள கட்டுப்பாடு மட்டும் தொடரும். இவ்வாறு செய்திக்குறிப்பில் தெரிவிக்கப்பட்டுள்ளது.

இன்றைய செய்திகள்....