விழியே பேசு...: தேர்தலில் பணம் வினியோகித்ததால் வாக்காளர் பட்டியலில் பெயர் நீக்கம்

Tuesday, April 19, 2011

தொண்டாமுத்தூர் தொகுதி இடைத்தேர்தலின் போது, வாக்காளர்களுக்கு பணப் பட்டுவாடா செய்ததாக கைதாகி தண்டனை பெற்றவரின் பெயர், வாக்காளர் பட்டியலில் இருந்து நீக்கப்பட்டுள்ளதாக பெரம்பலூர் மாவட்ட தேர்தல் அதிகாரி தெரிவித்துள்ளார்.

தொண்டாமுத்தூர் தொகுதிக்கான இடைத்தேர்தல், 2009, செப்., 18ல் நடந்தது. இத்தேர்தலில் காங்., மற்றும் கொ.மு.க., போட்டியிட்டன. தேர்தல் பிரசாரத்தின்போது வாக்காளர்களுக்கு பணம் கொடுப்பதாக வந்த தகவலைத் தொடர்ந்து, கொ.மு.க.,மாணவரணி மாநில செயலர் லோகநாதன் தலைமையில் கட்சியினர் தீவிர கண்காணிப்பில் ஈடுபட்டனர்.

தி.மு.க., கூட்டணியைச் சேர்ந்த பெரம்பலூர் கிருஷ்ணமூர்த்தி, வாக்காளர்களுக்கு பணப் பட்டுவாடா செய்தபோது பிடிபட்டார். அவரிடம் இருந்து, 200 ரூபாயுடன் கூடிய, 150 கவர்கள் பறிமுதல் செய்யப்பட்டன.

சரவணம்பட்டி போலீசார் விசாரித்து, கிருஷ்ணமூர்த்தியை கைது செய்தனர். கோவை ஜே.எம்.எண்: 2 கோர்ட்டில் வழக்கு விசாரிக்கப்பட்டு, 2,000 ரூபாய் அபராதம் விதிக்கப்பட்டது. தொடர்ந்து, தேர்தல் விதி மீறலுக்காக ஆறாண்டு காலத்துக்கு ஓட்டளிக்கும் உரிமை ரத்து செய்யப்பட்டது. ஆனால், இந்த அறிவிப்பு முறையாக தேர்தல் கமிஷனால் அறிவிக்கப்படவில்லை.

அதிருப்தி அடைந்த லோகநாதன், சென்னை ஐகோர்ட்டில் மீண்டும் தமிழக தேர்தல் கமிஷனர், மாவட்ட தேர்தல் அலுவலர், பெரம்பலூர் ஆகியோர் மீது வழக்கு தொடர்ந்து, சம்பந்தப்பட்ட அறிவிப்பை வெளியிட வலியுறுத்தினார். இதைத் தொடர்ந்து, பெரம்பலூர் மாவட்ட கலெக்டரும், மாவட்ட தேர்தல் அதிகாரியுமான விஜயகுமார், சென்னை வக்கீல் கிறிஸ்டோபருக்கு (லோகநாதனின் வக்கீல்) அனுப்பியுள்ள கடிதத்தில், குற்றம் சாட்டப்பட்ட கிருஷ்ணமூர்த்தி என்பவர் குன்னம் தொகுதி, கீழமாளிகை கிராமம் முருகபடையாச்சியின் மகன் கிருஷ்ணமூர்த்தி என்பவரின் பெயர் வேட்பாளர் பட்டியலில் இருந்து நீக்கம் செய்யப்பட்டுள்ளது. இந்த நீக்கம் 2010, ஆக., 20ல் இருந்து ஆறு ஆண்டு காலத்துக்கு நீடிக்கும் என தெரிவிக்கப்பட்டுள்ளது. இத்தகவலை கொங்கு நாடு முன்னேற்றக் கழக மாநில மாணவரணி செயலர் லோகநாதன் தெரிவித்தார்.

இன்றைய செய்திகள்